jab bahāyā hī nahīñ aañkh se paanī maiñ ne ek hī lafz meñ likh dī hai kahānī maiñ ne zabt tūfān kā TuuTā na kabhī siine meñ rok rakkhī hai samundar kī ravānī maiñ ne shabd be-ḳhauf kitāboñ meñ utāre maiñ ne phir kitāboñ pe jamī ḳhaak bhī chhānī maiñ ne mujh ko vijdān thā sailāb ne to aanā hai dekh lī ḳhvāb meñ us shaam nishānī maiñ ne ārzūoñ ne mire dil meñ tabāhī kar dī phir kisī chaah kī ummīd na Thānī maiñ ne tū ne samjhā thā mujhe aaj bhī pāgal huuñ vahī 'ādateñ chhoḌ diiñ jitnī thiiñ purānī maiñ ne kyā batā.ūñ maiñ use 'umr-e-gurezāñ se 'umūd' siikh lī dasht meñ ab ḳhaak uḌānī maiñ ne